«Ազգային անվտանգության մարմինների մասին» Հայաստանի Հանրապետության օրենքի և ՀՀ օրենսդրությամբ իրեն վերապահված լիազորությունների շրջանակներում ՀՀ ԱԱԾ հետախուզական մարմինը, ինչպես ՀՀ, այնպես էլ օտարերկրյա պետության տարածքից իրականացնում է հետախուզական գործունեություն, այդ թվում՝ արտաքին հետախուզական գործունեություն, որն ուղղված է Հայատանի Հանրապետության ազգային անվտանգության սպառնալիքների մասին տեղեկություններ ստանալուն և պետության հիմքերն ամրապնդելուն: Հայաստանի Հանրապետության ազգային անվտանգության ծառայության Կանոնադրության համաձայն՝ ՀՀ ԱԱԾ-ն իրականացնում է Հայաստանի տարածքում ազգային անվտանգության խնդիրներին առնչվող հետախուզական գործունեություն ծավալող բոլոր պետական մարմինների և ստորաբաժանումների աշխատանքի օպերատիվ ղեկավարումը:
Պետական կառավարման համակարգում ՀՀ ԱԱԾ hետախուզության մարմինն ազգային անվտանգության ապահովման կարևոր բաղադրիչներից է և կոչված է պաշտպանելու անձի, հասարակության և պետության անվտանգությունն արտաքին սպառնալիքներից:
ՀՀ ազգային անվտանգության մարտահրավերներին և պետության դեմ ուղղված արտաքին վտանգներին դիմագրավելու, ինչպես նաև արտաքին քաղաքական դաշտում Հայաստանի կենսական կարևոր շահերին առնչվող խնդիրների արդյունավետ լուծման նպատակով իր գործառութային ուղղություններով հետախուզության մարմինը ձեռք է բերում, մշակում և վերլուծում հետախուզական տեղեկատվություն՝ ՀՀ բարձրագույն ղեկավարությանը զեկուցելու համար: Իր առջև դրված խնդիրների լուծման շրջանակներում իրականացնելով հետախուզական գործունեություն՝ այն աջակցում է նաև Հայաստանի բնականոն զարգացմանը ռազմատեխնիկական, տնտեսական, գիտատեխնիկական և այլ ոլորտներում։
Ցանկացած պետության համար հետախուզությունն անվտանգության ապահովման և արդյունավետ կառավարման կարևոր գործիքներից մեկն է: Անկախության առաջին իսկ օրերից հայկական հետախուզությունը զարգացավ և ամրապնդվեց դժվարին փորձությունների շրջանում, ինչը հաջողվեց Հայոց պետականության նախորդ ժամանակաշրջանների լավագույն փորձի արդյունավետ կիրառմամբ՝ զարգացնելով և թրծելով հետախուզական միտքն ու ոլորտի նրբությունները:
ՀՀ ԱԱԾ հետախուզական մարմինը, պատվով հաղթահարելով պատերազմական պայմաններով թելադրված փորձությունները, երկրի զարգացմանը և առաջընթացին համահունչ իր կարևոր և անփոխարինելի տեղը զբաղեցրեց Հայաստանի պետական կառավարման համակարգում:
Հետախույզի մասնագիտության յուրահատկություններով պայմանավորված՝ ոլորտի ծառայողների ամենօրյա դժվարին և պատասխանատու աշխատանքը, որպես կանոն, լուսաբանման ենթակա չէ և երկար տասնամյակներ մնում է գաղտնիության քողի տակ: Չակնկալելով սեփական աշխատանքի հրապարակային գնահատական՝ հետախուզության աշխատակիցներն օրնիբուն աշխատանքով իրենց անփոխարինելի լուման են ներդնում Հայաստանի Հանրապետության առաջընթացի և հետագա զարգացման անշեղ նպատակի իրականացման գործում:
